Calquera prato que leve allo porro seguro que me gusta e as receitas de Yotam ottolenghi encántame, así que esta era unha combinación perfecta que hai tempo que tiña ganas de probar. Estas tortiñas, moi especiadas, son moi fáciles de preparar. A próxima vez que as faga arriscareime a botarlles máis "guindilla" e conseguir un puntiño máis picante. A mesturar e a salsa poden prepararse con antelación e facer as tortiñas no último momento. Se sobran poden gardarse na neveira un par de días e quentalas uns segundos no microondas antes de consumilas, seguen estando boísimas.
Salsa:
100 g de iogur grego, 100 g de nata agre 2 dentes de allo, 2 culleres de zume de limón, 3 culleres de aceite de oliva, 1/2 culleriña de sal 30 g de follas de cilantro.
Ingredientes:
400 g de allo porro, 5 chalotas, 1 "guindilla" vermella fresca, 3/4 de culleriña de cilantro moído, 1 culleriña de comiño moído, 1/4 de culleriña de cúrcuma moída, 1/4 de culleriña de canela en po, 1/2 culleriña de sal, 1 ovo, 120 g de fariña de arroz, 1 culler de impulsor químico, 150 ml de leite, 55 g de manteiga derretida, aceite de oliva virxe extra.Salsa:
100 g de iogur grego, 100 g de nata agre 2 dentes de allo, 2 culleres de zume de limón, 3 culleres de aceite de oliva, 1/2 culleriña de sal 30 g de follas de cilantro.
Elaboración:
- Cortar os allos porros en aros de 1/2 cm de grosor.
- Pelar e picar as chalotas.
- Poñer nunha tixola dúas culleres de aceite de oliva e engadir o allo porro e as chalotas. Facer a lume suave ata que estean transparentes.
- Mentres poñer nun recipiente todas as especias xunto coa "guindilla" picada moi fina e sen sementes.
- Cando os allos porros e as chalotas estean feitos pasalos ao recipiente anterior, engadir o sal e mesturar ben coas especias e a guindilla.
- Noutro recipiente poñer o ovo batido, engadir a fariña, o impulsor químico, o leite e a manteiga. Mesturar ben ata ter una crema homoxénea.
- Mesturar as dúas preparacións.
- Poñer un pouquiño de aceite nunha tixola e quentar ao lume medio.
- Cando o aceite estea quente coller unha culler ben chea da mestura e poñela na tixola, esmagala un pouco para darlle forma de tortiña.
- Cando empece a coller cor polo lada de abaixo darlle a volta e deixar facer ata que colla cor.
- Retirar da tixola e reservar.
- Repetir o proceso ata rematar toda a mestura.
- Para a salsa picar as follas de cilantro e os dentes de allo. Mesturar todos os ingredientes.
- Servir as tortiñas xunto coa salsa.
Dificultade: Fácil.
Tempo aproximado: 1 hora e 15 minutos.
Comentarios
Publicar un comentario
Encantaríame saber a túa opinión